چاگرد چوں دیمروئی کنت؟ || مھمد نسیم

چاگرد چوں دیمروئی کنت؟

نبشتہ کار: مھمد نسیم

چاگرد ھما جاگاہ گْوشگ بیت کہ اود ءَ لس مھلوک جاہ ءَ نند انت۔ ھما بن آدم رمب ءِ وتی یک جتائیں دود ءُ ربیدگ، یک دومی ءَ ھوار تپاوت، وتی نیکراھی، سیاسی ھیال ءُ لیکہ بنت۔ ھمے پجار بن آدم ءِ ھما ھنکین ءَ یک چاگرد نام ءَ چہ شناسکار کنت۔

انچو کہ بلوچ دگنیا ءِ تہ ءَ یک زندگ ءُ ابدمانیں راجے زانگ بیت۔ بلوچ راج ءِ وتی یک جتائیں زبان ، لبزانک، دود ءُ ربیدگے ھست۔ چرے راجی بُن ھشتانی سبب ءَ بلوچ وت ءَ چہ دگہ راجاں یک جتائیں چاگردے زانگ بیت ۔ بلوچ راج ءِ زندمان، وشی یا کہ گم ءُ رنج گون بلوچ چاگرد ءَ بندوک اَنت۔ بلوچ یک کسے نہ انت بلکیں بلوچ یک چاگردے پمشکا بلوچ چاگرد ءِ ھمک جیڑہ سرجمیں راج ءِ جیڑہ لیکگ بیت۔ ھمے وڑ ءَ بلوچ چاگرد ءِ دیمروئی بلوچ ءِ وش بھتی انت ءُ بلوچ چاگرد ءِ پشت ءَ کپگ بلوچ ءِ بدبھتی ءِ نشانگ انت۔

چاگرد ھما وھد ءَ دیمروئی کنت وھدیکہ راجے ھمک بن آدم چاگرد ءِ جیڑھاں وتی جیڑہ بہ لیک ایت۔ ھریکے وتی جُھد ءَ پہ چاگرد ءِ دیمروئی ءِ ھاتر ءَ ھوار بہ کنت۔

انچو گْوش انت 1945 ءِ مزن جنگ ءَ جاپان ءِ دو مزنیں دمگ ھیروشیما ءُ ناگاساکی گوں ایٹم بم ءَ نشانگ کنگ بوت انت ءُ لس مھلوک مرگ ءِ آماچ کنگ بوت۔ بلے مروچی جاپان پد ءَ گوں ھما دیمروئی کتگیں ڈیھاں ھوار انت۔ ایشی ءِ سبب بس ھمیش انت کہ جاپان ءِ مردماں وتی زاتی دیمروئی ءَ چہ گیش وتی چاگرد ءِ دیمروئی ءِ نیمگ ءَ گامگیج زُرت۔ ھمے وڑ ءَ دگہ بازیں چیردستیں راجاں پہ وتی راجی جنز ءِ دیم ءَ برگ ءِ ھاتر ءَ جُھد کرتگ ءُ وتی سوب مندی ءِ سیمسراں سرکتگ۔ بلے مئے چاگرد ءِ تہ ءَ باز کم چوشیں مردم گندگ بیت کہ پہ چاگرد ءِ دیمروئی ءَ جُھد کنگ ءَ انت۔ مئے چہ چاگرد ءَ دور بوھگ ءِ مزنیں سبب دو بوت کن اَنت

اولی ھمش انت کہ ما سک لالچی ایں۔ ما مُدام بس وتی زاتی نپ، نکس ءِ بارو ءَ چار ءُ بچار کن ایں۔ دومی ھمش انت کہ مارا سک ترس ایت۔ ترس چو سیاھیں شپ ءَ مئے چمانی دیم ءَ اندوہ انت۔ ھمے ترس ءِ سبب ءَ ما‌ چہ زبان ءَ گُنگ ایں، چماں کور ایں ءُ گوشاں کَرّ ایں۔ چی ءَ کہ ما ھمے سرپد بہ ایں کہ مئے وتی جند ءِ آزا مئے دژمن اَنت ھمے واست ءَ مارا دروھ اَنت، مارا وھد ءِ دست ءَ تاوان ءِ آماچ کن انت بلے چو نہ انت راستی ءَ سکُرات دروھ ات نہ کُت، راستی ءَ کارل مارکس تاوان دات نہ کت۔ گار ءُ بیگواہ بنت ھما زوراکیں کس کہ وھدیکہ راستی ءِ گون ءَ جنگ ءِ جار کن انت۔ پد ءَ وھد ءِ دست ءَگوں ھاکان ھوار بنت۔ پمشکا چاگرد ءِ دیمروئی مُدام گوں راستھوئی ءَ گوں ھمگرنچ انت۔

آ چاگرد ھچبر دیمروئی نہ کنت کہ اود ءِ مردم 

لالچی ءُ ترس ءِ آماچ انت

دلگوش:- اے ھیال  ءُ لیکہ نبشتہ کار ئے جندئیگ اَنت۔ بلوچی لبزانک زمہ دار نہ اِنت