گوادر || جمیل مھراب
مرچی آزمان جمبراں مان شانتگ ات ءُ سارتیں گوات لھم لھم ءَ کشگ ءَ ات، من دگ ءِ نزیک ءِ ڈوپگ ءِ سر ءَ نشتگ ءُ وشیں موسم ءِ لزت ءَ گرگ ءَ ات آں۔
برے منی چم وتی کش ءِ درچک ءَ کپت انت کہ گوات آئی ءِ تاکاں سرینگ ءَ ات، برے من آزمان چار ات کہ جمبر گوں جمبراں ڈک ورگ ءَ ات انت۔
اناگت ءَ منی دوستیگیں سنگت میران گوں گاڑی ءَ اتک ءُ منی کش ءَ نشت۔
"بریں اڑے گوادر ءَ مناں مرچی کارے هست"
هما انت من چہ درملک ءَ اتکگ ات آں من ءُ میران دیمے نہ دیمے در کپتگ ات ایں۔
بلے مرچیگیں موسم ءَ دل ءَ نہ گشت دگہ دیمے در ءَ، بلے میران انچیں سنگتے ات من جواب دات اوں نہ کت۔
"میران یار تی کار مدام بے ٹیمب انت، اے نوں گوادر ءِ روگ ءِ وھد انت، مرچیگیں موسم ءَ بہ چار چو تاھیر دیگ ءَ انت"
"تو بریں یار کار اوں یل دیگ نہ بنت"
میران ءَ کند ات ءُ گشت۔
"شر ترا اے وھدی کجام کار کپتگ؟"
"کار ایش انت کہ من ءَ پت ءَ راہ داتگ ناکو ءِ کر ءَ تو برو دکانے هست بچار ئے اگاں ترا دوست بوت گڑا ما ءُ تئی ناکو پچ ئِے کنیں"
میران ءَ دراھینت۔
"شر بلے گپ ایش انت کار رند ءَ اول من ءَ گوادر ءَ ترین کہ ھما انت گوادر ءَ دیمروی کتگ من نہ دیستگ "
"شر۔۔۔ شر اڑے تو مدام وتا بے بهر نہ کن ئے"
آئی ءَ کند ات پسو دات۔
میران ءَ گاڑی ءِ ٹیپ چالو کت بلوچی زھیروک ءِ الہان انت ما دیم پہ گوادر ءَ رهادگ بیت ایں دو ساھت ءَ رند ما ڈی بلوچ ءَ سر بوتگ ات ایں۔
ڈی بلوچ ءِ سر بیگ ءَ ھور ءَ مورشنزگ بندات کتگ ات، گوات سارت سارت ءَ کشگ ءَ ات پد ءَ دگ ءِ دویں دیماں کوہ ، ءُ کوھانی کش ءَ رستگ ایں کاہ وشیں موسم ءِ زیبائی ءَ گیش کنگ ءَ ات انت۔
"ھوٹلے دیم ءَ کیت چاهے بہ بیت ۔۔۔چے گوش ئے؟"
میران ءِ جست کت۔
"ھو اڑے چاھی وَ موسمے" من گشت۔
ھوٹل ءِ گندگ ءَ من کمو ھیران بوتاں کہ بایدیں شریں ھوٹلے بوت ایں کہ گوادر ءِ راہ ءِ سر ءَ اَت، پد ءَ من دیست انچو ھوٹل، انچو ھوٹل ءِ کار کنوک۔
"یار دنیا دیمروی کنت بلے بلوچ انگت وتی بزگی ءَ در نئیت"
من بژنی گشت۔
"ھو یار راست گش ئے" آئی ءَ منی ھبر منّ ات ءُ گشت۔
ما چاهے چاهے وارت پد ءَ دگ گپت ءُ راهادگ بیتیں۔
ھور انگت مورشنزگ ءَ ات گوات لھم لھم ءَ کشگ ءَ ات۔
کمو دیم ءَ شت ایں ایپ سی ءِ چک پوسٹے اتک کہ درستیں گاڑی کتار ات انت ءُ سک پٹ ءُ کاھی ات۔
مئے باریگ اتک،
"کجا روگ ءَ ات وتی شناختی کارڈاں در کن ات جلدی۔۔۔ شاباش"
یک بچ کوٹیں سیاه تابیں سپاهیگے ءَ وتی پیشانی ءِ کرْچک گیشتر کت انت ءُ بدتمیزیں وڑے ءَ گشت گاڑی ءِ تہ ءَ چارگ ءَ لگ ات۔
ما کارڈ کش ات انت۔
"ما گوادر ءَ روگ ءَ انت" میران ءَ پسو دات۔
"شمے چے ھست گوادر ءَ"
آئی ءَ ریشکند ات ءُ تژن گشت ءُ دیم ترینت۔
"مئے چے ھست؟"
من مُرک موجینت ءُ دلمانگ ات آں کہ آئی ءَ جواب بہ دیاں۔
میران ءَ من ءَ اشاره کت ءُ مکن کت۔ پد ءَ مارا مئے کارڈ ئِے دات انت ءَ ما راه گپت ایں۔
ما چہ چیک پوسٹ ءَ دراتک ایں، منی گپ دپ ءَ ات کہ گوشاں سکیں بدتمیزیں سپاھیگے ات بلے پیسر ءَ میران ءَ گپ منی دپ ءَ پچ گپت ءُ گشت۔ "ایشاں بل کہ گپ کناں تو دپ مدئے گوں، وسریں مسیبت چیا مئے سرءَ مش ئے"
نوں گوادر نزیک ات ھور ءَ بس کتگ ات دریا اوں زاھر ات ما دریا ءَ چاران ءُ روان ات ایں۔
کمو دیم ءَ شت ایں مزنیں چک پوسٹے اتک۔اد ءَ پٹ ءُ کائی باز کنگ ءَ ات آں ھرکس کہ بلوچے ات، گیشتر تنکانسر کت ئے ءُ باز جست ءُ پرس کت ئے۔
نوں مئے باریگ ات۔
"شاباش جلدی گاڑی ءِ ڈکی ءَ پچ کن ات ،شما چے کن ات گوادر ءَ ؟"
یک پنجابی ایں سپاهیگے ءَ پہ زهر ءُ کست چہ ما جست گپت۔
"سر، مارا کار ھست ایں"
میران ءَ پسو دات۔
"چے کار ھست اود ءَ کجا دار ات ؟"
آئی ءَ پد ءَ ترندیں گالوارے ءَ جست کت۔
"سر ما وتی ناکو ءِ لوگ ءَ روگ ءَ ایں"
میران ءَ پسو دات۔
"شما بلوچ کار ئیگ نہ ات ھالات ءِ ھراب کنگ بس زان ات۔۔۔شر برو ات"
ما راه گپت ایں۔ ما نوں گوادر ءِ بازار ءِ توک ءَ سر بوتگ ات ایں۔ بلے ھمک نیمگ کہ چار ات ھیران ءُ اجکہ بوت آں۔ اے نہ گوش ئے کہ بلوچانی گوادر ءَ ،اد ءَ یک بلوچے زاھر نہ ات درست گیشتر چینی ءُ پنجاپی ات انت مزنیں مزنیں دگ ءُ مزنیں مزنیں ماڑی مک ات انت۔
اناگت ءَ منی چم ریڈی والائے ءَ کپت انت بلوچی گدے گور ءَ ات "آ انت گوش ئے بلوچے ؟"
من میران ءِ کوپگ دست جت ءُ جست کت۔
"بلوچ هست بلے کم انت اد ءَ نوں گیشتر بلوچ مزدوراں لھتے ءَ ریڈی جتگ لھتے ماھیگیر انت، کمو جوڑ تریں بلوچ هست بلے زانگ نہ بنت کہ بلوچ انت ،
ایشانی پچ ءُ پوشاک نندگ ءُ پاد آیگ درست پنجاپیانی وڑ ءُ پیم ءَ انت ، اے بلوچی ءَ هبر اوں نہ کن انت"
میران ءَ من ءَ سرپدی دیان ءَ گشت۔
"دیم ءَ تیاب ءِ دپ ءَ وشیں جاگهے هست انت کہ اود ءَ چینی ءُ دگہ درملکی جنک نیم برهنگ ءَ جان شود انت"
آئی ءَ وتی دست دیمی نیمگ ءَ ٹال کت ءُ گشت۔
"گڑا بریں همود ءَ تماشاهے چاریں"
من اجست ءَ پسو دات۔
ما روگ ءَ ات ایں تیاب ءِ نیمگ ءَ یک جاگهے پد ءَ مارا سپاھیگاں داشت گونڈیں چیک پوسٹے ات۔
"کجا روگ ءَ ات؟"
یک لونڈ سریں سبز رنگیں سپاهیگے ءَ وتی سر گاڑی ءِ سیٹ ءِ تہ ءَ پترینت ءُ مئے نیمگ ءَ زهرناکیں نگاهے چار ات ءُ گشت۔
"سر ۔۔۔ما تیاب دپ ءَ روگ ءَ ایں"
میران ءَ دست شھار دات ءُ پسو دات۔
"اود ءَ چے کن ات؟، ایر ءَ ات شمارا پٹ انت"
آئی ءَ پد ءَ وتی دیم کرچک کت۔
"مارا شما عزاب کتگ ھر جاگہ ءَ جست کن ئے چے کن ات، ما زاناں انسان نہ ایں تیاب ءَ شت نہ کنیں ؟"
من گوں ھرابیں مجگے ءَ گشت۔
"چے گش ئے ؟ ۔۔۔یکے شما بلوچاں اد ءِ ھالات ھراب کتگ انت دومی بدتمیزی کن ات،۔۔۔۔۔ "
آئی ءَ من ءَ زاهے دات ءُ ترند ترند ءَ گشت۔
"ما بلوچ انت بے غیرت تو مارا زاہ دئیت؟"
گپ منی دپ ءَ ات کہ تپنگ ءِ کنداک ءَ منی سر ءِ توک ءَ توار کت۔۔۔
پد ءَ من کہ چم پچ کت انت، گنداں نادراه جاه ءِ تهت ءِ سر ءَ تچک ات آں۔
۔۔۔۔۔۔۔۔۔۔۔۔۔۔۔۔۔۔۔۔
15/11/2017
ضدنا، الفجیرہ،امارات
0 Comments