دل کشیں چو پُلّانی اندام کئے ءَ زانتگ
پیسر چہ منی عشق ءَ تئی نام کئے ءَ زانتگ

داں شُشتگیں زلفاں تئی نودانی شَلگ بندیں
تُنیگیں بھارانی ھوشام کئے ءَ زانتگ

اے مُرگ کہ کُوکُو کنت مئے زِرد ءِ گشیت حالاں
نوداں گوں صباح ءِ کیت پیغام کئے ءَ زانتگ

تو وھدے کہ سر گپت ئے واب اوں شُتگ چمانی
دانکہ ترا نہ دیستگ آرام کئے ءَ زانتگ

دانکہ تئی چراغیں غم چہ مئے دلاں اندیم اِنت
پہ منزل ءَ سر بنت ایں چوں گام کئے ءَ زانتگ

منیر مُومن