( رجانک,, دید،، الطاف منیر) 


وھدیکہ شپ بوت ءُ واب ءَ وتی چادر زمین ءِ دیما سینگار ات، من مار اِت کہ منی تھت دیم پہ زِر ءِ نیمگ ءَ روان اَت ءُ من ءَ گوشان اَت کہ زِر نہ وپس ایت ءُ زِر ءِ آگہی پہ ارواہ ءَ یک بامے کہ آرام نہ کنت-

من کندی(Sea Shone) ءَ سر بوتاں، اود ءَ گیتلو چہ کوھانی ٹُلّ ءَ بگر داں ھر نیمگ ءَ شِنگ ءُ تالان بوتگ ات ءُ ھما جاہ ءَ را انچو پِر داتگ ات ئےِ چوش کہ یک ھاکی رنگیں پردہ یے یک زیبائیں جنکّے ءِ دیما چیر بہ دنت-

من اوشتات ءُ چؤلانی دژمنانی نیمگ ءَ چارگ ءَ لگّت اوں ءُ آھانی شادمانیں کُوکّاران گوشدارگ ءَ اتوں- ابدمانیں زات ءِ قدرتاں روک روک ءَ چارگ ءَ اتوں، آھانی باپُشت ءِ طاقت ءَ، ھما طاقت کہ گوں طوفان ءَ تاچ کنتیں، آسکوھانی نزیک ءَ تالاں بیت، گلاب گونگیں بچکند جنت، گوں چمگّان شاتکامی ءِ سؤت جنت-

ساھتُکے ءَ رند من چپ ءُ چاگرد ءَ چارِت، نزیک ءَ تلارے ءِ سرا سئے جاتو نِشتگ اَت-

گیتلو سر پُروش کنگ ءَ ات میزان میزان ءَ، من میزاں میزان ءَ ھماھانی نیمگ ءَ روان بوتاں، تَنے وھدی گیتلو ءَ آھان ءَ سر پروش نہ کتگ اَت-من ءَ انچو سما کپت کہا آھانی ھستی ءِ زور منی دلگوش ءَ وتی گْور ءَ برگ ءَ اِنت ءُ منی ارواہ ءَ پروش دیگ ءَ انت-

من وھدے آھانی نیمگ ءَ لھتیں گام دؤر دات ءُ پدا اناگت ءَ اوشتاتاں ءُ آھان ءَ چارگ ءَ لگّ اتاں-پورہ آ جاہ ءَ سِھری یے تالان بوت، منی جزم ءَ کنٹ کنگ ءَ انت ءُ منی ارواہ ءِ چیریں گُمان ءَ پاد کنگ ءَ انت-

ھما دمان ءَ چہ آ سئینانی تھا یکّے پاد اَتک ءُ چہ زِر ءِ جھلانکیان یک توارے دراتک کہ,, زند ابید چہ مھر ءَ ھما دْرچک ءِ پیم ءَ انت کہ نہ گرنچہے پِر نہ میوہ- مھر ابید زیبائی ءَ ھما پُلّانی پیم اِنت کہ وشّیں بُو نہ کنت ءُ ھما میوھانی وڑ ءَ اِنت کہ توم اِش مان نیست- زند، مھر ءُ زیبائی سئے مردماں یک شئے ءِ تھا-آجو، بیرگ ءَ جتائی ءُ بدلی نہ منّ اتگ-،، 

اے لبزانی گْوشگ ءَ رند آ پدا ھما جاہ ءَ شُت-پدا دومی جاتو پاداتک، ھارآپ نہردگ ءِ پیمیں توار ءَ گوں آئی گْوشت,, زند ابید چہ سرکشّی ءَ ھما موسمانی وڑ ءَ انت، گندئے بھارگاہ مہ بیت-سرکشّی ابید چہ راستگوئی ءَ ھما بھارگاہ ءِ پیم ءَ انت کہ یک سردیں ءُ ھُشکیں ریگستان ءِ سرا-زند، سرکشّی ءُ راستگوئی.... سئے مردماں یکین شئے ءِ تھا- ھچ وڑیں بدلی ءُ جتائی نہ منّاں-

نوں سیمی جاتو دیمتر ءَ اتک ءُ گوں گرندوکیں توارے ءَ گُشت ئےِ,, زند ابید چہ آجوئی ءَ ھما بدن ءِ پیم ءَ انت کہ ارواہ ئےِ مان نیست، آجوئی ابید چہ پگر ءَ یک رنجیگین ارواھے ءِ پیم ءَ انت-

زند، آجوئی ءُ سما سئے مردم اَنت، یکین شئے ءِ تھا-ابدمان، دائمی ءُ نہ اوشتوک-،،

نوں سئیں جاتو یکجاہ پاد اتک انت ءُ گوں تُرسناکیں گالوارے ءَ آھاں ھوری ءَ گْوشت: ,, مھر انت کہ ایشرا جوڑ کنت، سرکشّی انت کہ ایشرا ودی کنت ءُ آجوئی انت کہ ایشرا رودین ایت-

یزدان ءِ سئے پدّرائی، یزدان اگلی (National) دنیا ءِ جبین انت-

پدا بے ترْک ءُ تواری بوت، چہ نہ دیستگیں بانزلانی سر ءُ پُران ءُ ارواہی بدن لرزگ ءَ چے چکار اَت-

من وتی دیدوک بند کت انت-پہ گْوانکین لبزان گوشدارگ ءَ اتاں کہ اشکتگ اتاں، وھدے من وتی چمّ پچ کت آں ءُ پدا چارِت ایوک ءَ من نیلیں زِر دیست کہ گیتلو ءَ یک کپن یے ءِ تھا پتاتگ ات، من تلار ءِ نزیک ءَ شُتاں کہ ھمود ءَ سئیں جاتو نشتگ اتنت ءُ نوں اود ءَ من ایوک ءَ وشبو ءِ تمبے دیست کہ آزمان ءِ دیما چست بوتگ ات-


دلگوش:- اے رجانک چہ واجہ تارک یشکانی  ءِ پیسبک ءَزورگ بوت ءَ